concursoescolarparlamentodegalicia

SOLICITUDE DE INSCRICIÓN II EDICIÓN

2012-01-27T10:34:00.002+01:00

Anexo I

Solicitude de inscrición

D./D.ª ……………………………………………………………………..

Director/a do Centro……………………………………………….....

Domiciliado en………………………………………………………….

Localidad………………………, CP…………………., Tel.: ………..

EXPÓN

Que coñece a convocatoria da II edición do concurso escolar baixo o lema «Parlamento de Galicia, a túa casa. A casa de todos os galegos e as galegas», correspondente ao curso académico 2011/2012.

Que comunica a participación nel dos grupos de alumnos que envía en lista axunta a este anexo (acompáñase a listaxe cos nomes dos alumnos que conforman o grupo, incluíndo o DNI de cada profesor ou titor responsable), e que, para tal efecto, declara que o número de alumnos participantes é de ……., dos niveis …………………, cursos…………………….., dos que son profesores/as…………………………………………………, responsables deles, co obxecto de participar nas categorías …………………………………………………….

Polo que solicita participar no citado concurso e prestar a súa colaboración para o seu mellor desenvolvemento.

.........................., o … de …….. de …

Asdo.: …………………………………..

EXCMA. SRA. PRESIDENTA DO PARLAMENTO DE GALICIA

II EDICIÓN DO CONCURSO ESCOLAR «PARLAMENTO DE GALICIA, A TÚA CASA. A CASA DE TODOS OS GALEGOS E AS GALEGAS». BASES DA CONVOCATORIA

2012-01-20T14:14:00.004+01:00

1. TEMA E ACEPTACIÓN DAS BASES

O Parlamento de Galicia convoca a II edición do concurso escolar baixo o lema «Parlamento de Galicia, a túa casa. A casa de todos os galegos e as galegas».

A participación no concurso supón a expresa aceptación, por parte dos participantes, destas bases e a autorización expresa dos menores participantes (de seus pais e nais ou titores legais) da cesión dos seus datos persoais, imaxe e cesión a terceiros e publicación dos seus traballos, o cal deberá facerse por escrito na documentación que se lle envíe á Cámara.

2. REQUISITOS E CARACTERÍSTICAS DOS TRABALLOS

Os traballos terán que versar sobre o Parlamento de Galicia en todas as modalidades. O seu formato e soporte serán diferentes, en función dos niveis educativos.

Os traballos deberán ser colectivos e elaborados por un grupo de dous alumnos como mínimo e cinco como máximo. Cada alumno só poderá participar nun grupo e cada grupo presentará un único traballo.

Os traballos realizaranse baixo a orientación dun profesor ou profesora responsable. En consecuencia, o docente deseñará o traballo de referencia xuntamente co grupo ou os grupos de alumnos do curso, procurando a motivación do alumnado e fomentando a súa creatividade. De todos os traballos realizados será o propio docente, en colaboración cos seus alumnos, quen seleccione e decida cal é o único traballo que vai representar a súa clase para ser enviado ao Parlamento de Galicia. Cada centro educativo poderá enviar un máximo de cinco traballos por cada modalidade do concurso.

En xeral teranse en conta como criterios de valoración a creatividade e orixinalidade dos traballos realizados, a imaxinación, a dificultade e, sobre todo, a correcta e clara transmisión dunha mensaxe.

Resulta importante amosar o coñecemento que se posúe da institución parlamentaria, dentro do grao de madureza e do nivel da modalidade educativa na que se participe.

3. PARTICIPANTES

O concurso está dirixido a alumnos/as de educación infantil, primaria, secundaria e educación especial, segundo a modalidade de que se trate.

4. MODALIDADES

4.1. Concurso de debuxo/pintura (todas as técnicas)

Está dirixido ao alumnado de infantil, de 1.º, 2.º e 3.º de educación primaria e de educación especial.

Formato e soporte do traballo:

· Medida en DIN-A 3

· Papel e cartolina

· Collage

· Cómic

4.2. Concurso de redacción

Está dirixido ao alumnado de 4.º, 5.º e 6.º de primaria e 1.º e 2.º de secundaria. As redaccións serán manuscritas e terán unha extensión máxima dun folio.

4.3. Concurso de expresión libre

Está dirixido ao alumnado de 3.º e 4.º de secundaria. Valorarase calquera tipo de expresión creativa como vídeo, fotografía, spot publicitario ou medio relacionado coas tecnoloxías da información, que poida ser inserido nunha páxina web. Non se admitirán maquetas físicas.

5. INSCRICIÓN E PRESENTACIÓN DOS TRABALLOS

Os centros interesados en participar no concurso deberán facer a súa inscrición antes do 10 de febreiro de 2012 mediante unha solicitude, segundo o modelo que figura no anexo I, dirixida á presidenta do Parlamento e enviándoa ao correo electrónico presidencia@parlamentodegalicia.es, na que se indiquen os nomes dos profesores e grupos que elaborarán os traballos, así como a aceptación do compromiso de facer as seleccións previas necesarias que lles permitan establecer cales son os traballos que presentará o centro ao concurso.

Os centros inscritos poderán solicitar calquera aclaración que consideren necesaria para o desenvolvemento do concurso, a través dese correo electrónico.

Os traballos, dirixidos á presidenta do Parlamento de Galicia, deberán levar unha etiqueta identificativa coa denominación «CONCURSO ESCOLAR», e presentaranse ou enviaranse por correo postal, antes do 13 de abril de 2012, no Rexistro do Parlamento de Galicia (rúa do Hórreo, 63, 15701-Santiago de Compostela).

Os orixinais irán acompañados dunha etiqueta polo reverso dos traballos, na que se incorporará e completará conforme se indica a continuación, o seguinte texto:

«TRABALLO PRESENTADO NA MODALIDADE DE ..... EN REPRESENTACIÓN DO CURSO/AULA ..... DO CENTRO ESCOLAR ….., COORDINADO POLO/A PROFESOR/A ..... E ELABORADO POLO GRUPO DO QUE FORMAN PARTE OS SEGUINTES ALUMNOS: .......».

Neste texto expresaranse necesariamente os seguintes datos: a modalidade na que se participe; o curso ao que pertenza o grupo participante; o nome e os apelidos do profesorado que coordine; o nome, os apelidos e a idade de cada un dos integrantes do grupo de traballo; o nome do centro escolar, co enderezo, teléfonos de contacto e correo electrónico.

Aqueles traballos que incumpran algunha das bases establecidas quedarán automaticamente excluídos das deliberacións do xurado.

Os traballos dos participantes non gañadores poderán retirarse na sede do Parlamento de Galicia durante o prazo dun mes, contado a partir da data na que se faga pública a decisión do xurado encargado de resolver os premios.

6. XURADO

O xurado estará composto polos membros da Mesa do Parlamento, ou os deputados nos que deleguen, e por un docente proposto polo Parlamento de Galicia.

7. PREMIOS

Concederanse en cada modalidade dous premios: un primeiro premio para o grupo que resulte gañador, e un segundo premio ou premio finalista ao grupo que quede en segundo lugar.

Ademais concederase un premio á clase á que pertenza o grupo gañador, outro para o/a docente que supervisase o devandito grupo e outro ao centro educativo ao que pertenza ese grupo gañador.

7.1. Contido dos premios:

a) Para os alumnos do grupo gañador:

– Concurso de debuxo/pintura: Nintendo DS, xogo sobre a arte de pintar e un lote de libros.

– Concurso de redacción: ordenador portátil e un lote de libros.

– Concurso de expresión libre: ordenador portátil e un lote de libros.

b) Para a clase do grupo gañador: excursión de carácter educativo para visitar un lugar significativo de Galicia, na data que decida o centro.

c) Para o/a profesor/a supervisor/a do traballo do grupo gañador: unha táboa dixital.

d) Para o centro educativo do grupo gañador: a cantidade de 2.000 euros para destinar á organización de actividades extraescolares ou actividades da biblioteca escolar, que será ingresada na conta bancaria que se indique. Estes premios non son acumulables, polo que os centros soamente poderán recibir o premio de 2.000 € con independencia das modalidades nas que poidan resultar premiados.

e) Para o grupo finalista: MP4 e un lote de libros.

Os alumnos e as alumnas que resulten premiados, acompañados do profesorado que coordinou a realización dos traballos, serán convidados a un acto no Parlamento de Galicia no que se entregarán os premios ás distintas categorías.

8. DEREITOS DE PROPIEDADE INTELECTUAL

O Parlamento de Galicia reserva para si o dereito a publicar en modo impreso, en soporte dixital e na súa páxina web, na súa totalidade ou en parte, os traballos premiados.

O Parlamento de Galicia reserva para si todos os dereitos de propiedade e uso dos traballos premiados, así como a posibilidade de darlles difusión por calquera medio.

Pilar Rojo: “A Galicia do mañá será moito mellor que a de hoxe” porque “os rapaces que rexerán o noso destino rebosan capacidade, inxenio e destreza”

2011-06-20T13:36:00.004+02:00

• O Parlamento de Galicia acolleu a entrega dos premios do seu concurso escolar, que rexistrou unha elevada participación con preto de 900 orixinais presentados

• Pilar Rojo constata que “malia os tópicos, sí é posible suscitar o interese dos máis novos polo traballo que se desenvolve nas institucións”

Santiago, 20 de xuño de 2011.- Os preto de 900 traballos presentados ao Concurso Escolar do Parlamento galego énchennos de orgullo porque “constatamos que a Galicia do mañá será moito mellor que a de hoxe” dado que “os rapaces que dentro de nada rexerán o noso destino rebosan capacidade de traballo, inxenio e destreza como quedou demostrado nos orixinais recibidos”. Son palabras da presidenta do Parlamento de Galicia, Pilar Rojo Noguera, no acto de entrega dos premios do Concurso Escolar 2010-2011, organizado pola Cámara Galega.

A xuízo da titular do lexislativo galego, a elevada participación rexistrada neste concurso (888 orixinais) permite constatar que “malia os tópicos de sempre, sí é posible suscitar o interese dos máis novos polo traballo que se desenvolve nas institucións”, pero tamén acredita a “enorme implicación do persoal docente”. “Sen o ánimo e o impulso do profesorado, esta elevada participación non tería sido posible”.

Cultivar o interese dos máis novos polo Parlamento

Nesa estratexia, “cultivar o interese dos máis novos polo que aquí se fai é unha condición imprescindible para incrementar esa proxección que todos arelamos”.

Na súa intervención, a presidenta do Parlamento tivo verbas de agradecemento para a Consellería de Educación que asesorou ao Parlamento na posta en marcha do concurso. Pero agradeceu tamén o traballo desenvolvido polo persoal da Cámara e polos membros do Xurado, por ter afrontado con éxito esta tarefa.

Pilar Rojo rematou facilitando aos galardoados e a toda a comunidade educativa de Galicia, á que animou a “continuar transitando por esta senda- a da educación, no sentido máis amplo- que nos conduce a unha Galicia mellor para todos”.

GAÑADORES E FINALISTAS

Os seleccionados foron os seguintes:

CONCURSO DE DEBUXO:

Alumna gañadora: NOELIA TINOCO LACOMBA (doc. núm. 64483)

• Centro escolar: Escola Rosalía de Castro. Vigo. Pontevedra.
• Clase: 4º B de primaria
• Profesor que supervisou á gañadora: D. José Manuel Carnero González

Alumna finalista: CLARA FERNÁNDEZ CASÁS (doc. num. 64348.1) (alumna de 4º de primaria no CEIP Raquel Camacho. A Coruña)

CONCURSO DE REDACCIÓN:

Alumno gañador: DANIEL VICENTE GUTIÉRREZ SALVADOR (doc. núm. 64510.8)
• Centro escolar: IES Ánxel Fole. Lugo
• Clase: 2º da ESO
• Profesora que supervisou ao gañador: D.ª Carme Millares Fernández

Alumna finalista: IRENE LÓPEZ GONZÁLEZ (doc. núm. 64471)(alumna de 2º da ESO no CPR La Merced. Sarria. Lugo)

CONCURSO DE EXPRESIÓN LIBRE:

Alumnos gañadores: LARA RUBAL OTERO, CRISTIAN VIZCAÍNO RODRÍGUEZ E PATRICIA MARTÍNEZ PAZ (doc. núm. 64518.1)
• Centro escolar: IES San Rosendo. Mondoñedo. Lugo.
• Clase: 3º B da ESO
• Profesora que supervisou aos gañadores: D.ª Amparo Bermúdez González

Alumna finalista: RAQUEL FERNÁNDEZ BARREIRO (doc. núm. 64401.15)(alumna de 4º da ESO no CPI Covaterreña. Baiona. Pontevedra).

Finalmente, o Xurado propón unha mención especial para os seguintes alumnos:

ÁLVARO PAZOS FERNÁNDEZ (doc. núm. 64554.2)(alumno de 2º ciclo no Centro de Educación Especial Saladino Cortizo. Vigo)

SARA PEDRIDO GARCÍA (doc. núm. 64552.17) (alumna no Centro de Educación Especial Príncipe Felipe. Pontevedra)

Estudantes de Vigo, Lugo e Mondoñedo, gañadores do Concurso Escolar do Parlamento de Galicia

2011-06-10T14:06:00.002+02:00

- Os finalistas están escolarizados en centros da Coruña, Sarria e Baiona

- O xurado propuxo unha mención para dous alumnos de educación especial

- Os premios entregaranse o vindeiro 20 de xuño no Parlamento

- A presidenta do Parlamento agradece o esforzo desenvolvido polos membros do Xurado, que para seleccionar aos gañadores tiveron que revisar 888 traballos pertencentes a 52 centros educativos

Santiago, 10 de xuño de 2011.- O xurado encargado de seleccionar aos gañadores do Concurso Escolar 2010-2011 convocado polo Parlamento de Galicia seleccionou, por unanimidade, aos gañadores e finalistas de cada unha das tres modalidades, –debuxo, redacción e expresión libre- , ademais de propoñer unha mención especial para dous alumnos de educación especial.

Os gañadores están escolarizados en centros educativos de Vigo, Lugo e Mondoñedo, mentres que os finalistas cursan estudos na Coruña, Sarria e Baiona. Os alumnos de educación especial que recibiron unha mención especial pertencen a centros de Vigo e Pontevedra.

A entrega dos premios terá lugar o vindeiro día 20 de xuño, luns, no Parlamento de Galicia, nun acto ao que ademais dos gañadores e finalistas, se convidará á clase de cada un dos galardoados, aos profesores que supervisaron os traballos seleccionados e aos directores dos centros.

Agradecemento ao xurado

O Xurado encargado se seleccionar os traballos estivo presidido polo vicepresidente primeiro do Parlamento, José Manuel Baltar Blanco; pola presidenta da Comisión 4ª, Educación e Cultura, Marisol Piñeiro; polos portavoces de Educación dos tres grupos parlamentarios, Román Rodríguez (PPdeG), Guillermo Meijón (PSdeG-PSOE) e Carme Adán (BNG), así como polo docente Jose Manuel Rosales Noves.

A presidenta do Parlamento de Galicia, Pilar Rojo Noguera, agradece o esforzo desenvolvido polos membros do xurado, que revisaron cada un dos 888 traballos presentados ao concurso.

Esta elevada cifra de participación certifica, en opinión de Rojo Noguera, que sí é posible suscitar o interese dos máis novos polas institucións que articulan o sistema democrático e o autogoberno de Galicia.

Os 888 participantes nesta edición do Concurso Escolar do Parlamento están escolarizados en 52 centros educativos. Destes, 21 pertencen á provincia da Coruña, 9 á de Lugo, 5 á de Ourense, e 17 á de Pontevedra.

GAÑADORES E FINALISTAS

Os seleccionados foron os seguintes:

CONCURSO DE DEBUXO:

Alumna gañadora: NOELIA TINOCO LACOMBA (doc. núm. 64483)

· Centro escolar: Escola Rosalía de Castro. Vigo. Pontevedra.

· Clase: 4º B de primaria

· Profesor que supervisou á gañadora: D. José Manuel Carnero González

Alumna finalista: CLARA FERNÁNDEZ CASÁS (doc. num. 64348.1) (alumna de 4º de primaria no CEIP Raquel Camacho. A Coruña)

CONCURSO DE REDACCIÓN:

Alumno gañador: DANIEL VICENTE GUTIÉRREZ SALVADOR (doc. núm. 64510.8)

· Centro escolar: IES Ánxel Fole. Lugo

· Clase: 2º da ESO

· Profesora que supervisou ao gañador: D.ª Carme Millares Fernández

Alumna finalista: IRENE LÓPEZ GONZÁLEZ (doc. núm. 64471)(alumna de 2º da ESO no CPR La Merced. Sarria. Lugo)

CONCURSO DE EXPRESIÓN LIBRE:

Alumnos gañadores: LARA RUBAL OTERO, CRISTIAN VIZCAÍNO RODRÍGUEZ E PATRICIA MARTÍNEZ PAZ (doc. núm. 64518.1)

· Centro escolar: IES San Rosendo. Mondoñedo. Lugo.

· Clase: 3º B da ESO

· Profesora que supervisou aos gañadores: D.ª Amparo Bermúdez González

Alumna finalista: RAQUEL FERNÁNDEZ BARREIRO (doc. núm. 64401.15)(alumna de 4º da ESO no CPI Covaterreña. Baiona. Pontevedra).

Finalmente, o Xurado propón unha mención especial para os seguintes alumnos:

ÁLVARO PAZOS FERNÁNDEZ (doc. núm. 64554.2)(alumno de 2º ciclo no Centro de Educación Especial Saladino Cortizo. Vigo)

SARA PEDRIDO GARCÍA (doc. núm. 64552.17) (alumna no Centro de Educación Especial Príncipe Felipe. Pontevedra)

O Concurso Escolar do Parlamento rexistra unha cifra récord de participación, con 888 traballos recibidos, pertecentes a 52 centros

2011-05-16T13:05:00.000+02:00

A presidenta do Parlamento amosa a súa satisfacción por esta elevada participación que demostra que sí é posible suscitar o interese dos máis novos polas institucións

Rojo Noguera aposta por institucionalizar a iniciativa cunha periodicidade anual

Santiago, 10 de maio de 2011.- O Concurso escolar convocado polo Parlamento de Galicia para suscitar o interese dos máis novos polo funcionamento do lexislativo galego rexistra unha cifra récord de participación. Pechado o prazo de admisión de traballos, están rexistrados un total de 888 orixinais que optan a unha das tres modalidades da convocatoria: debuxo, redacción e expresión libre.

Estes participantes están escolarizados en 52 centros educativos de toda a Comunidade. Destes, 21 pertencen á provincia da Coruña, 9 á de Lugo, 5 á de Ourense, e 17 á de Pontevedra.

Satisfacción de Pilar Rojo

A presidenta do Parlamento de Galicia, Pilar Rojo Noguera, amosa a súa satisfacción polo elevado número de participantes rexistrados neste concurso, feito que, na súa opinión, demostra que sí é posible suscitar o interese dos máis novos polas institucións sobre as que se sustenta o sistema democrático.

Á vista do elevado eco desta convocatoria, Rojo Noguera aposta por institucionalizar a iniciativa cunha periodicidade anual, no marco da política de portas abertas impulsada desde que asumiu a Presidencia do lexislativo autonómico galego.

Xurado plural

Unha vez clasificados todos os traballos, o xurado –integrado polos membros da Mesa do Parlamento ou deputados nos que deleguen, e por un docente designado pola presidenta da Cámara- reunirase en datas vindeiras para seleccionar un gañador e un finalista por cada unha das tres categorías establecidas nas bases da convocatoria.

A entrega dos premios celebrarase na sede do Parlamento de Galicia ao longo do vindeiro mes de xuño.

BASES DO CONCURSO

2011-03-03T17:19:00.000+01:00

Concurso de debuxo, dirixido ao alumnado de 1.º, 2.º, 3.º e 4.º de primaria.
Formato máximo: tamaño folio ou dobre folio.

Concurso de redacción, cunha extensión máxima dun folio, manuscrito, a dobre espazo. Dirixido ao alumnado de 5.º e 6.º de primaria e 1.º e 2.º da ESO.

Concurso de expresión libre, dirixido ao alumnado de 3.º e 4.º da ESO.
Aberto a calquera tipo de expresión creativa, como redacción, debuxo e pintura, fotografía, vídeo, tecnoloxías de información... Poderán concursar alumnos e alumnas a título individual ou grupos.

Nos tres casos, tamén se seleccionará cadanseu finalista.

Presentación dos orixinais
Enviaranse ao Parlamento de Galicia (Concurso escolar), rúa do Hórreo, 63, 15701 Santiago de Compostela, antes do 29 de abril de 2011.
Os orixinais non se devolverán e o Parlamento reserva o dereito a publicalos integramente ou en parte.
Os orixinais irán acompañados dunha etiqueta cos datos: nome e apelidos da persoa autora, idade e curso, nome e apelidos do profesorado que coordine e nome do centro escolar, con enderezo, teléfonos de contacto e correo electrónico.

Decisión do xurado
O xurado estará composto polos membros da Mesa do Parlamento, ou os deputados nos que deleguen, e por un docente proposto polo Parlamento de Galicia. Tamén realizará unha selección dos mellores traballos, que se publicarán na www.parlamentodegalicia.es e serán expostos na sede parlamentaria.

PREMIOS

2011-03-03T17:00:00.000+01:00

Persoa gañadora:
Concurso de debuxo: un ordenador e un lote de libros.
Concurso de redacción: un ordenador e un lote de libros.
Concurso de expresión libre: un ordenador e un lote de libros.

Finalistas: un lote de libros e un equipo portátil de audio.

Clase de cada unha das persoas gañadoras: excursión de carácter educativo para visitar un lugar significativo de Galicia, na data que decida o centro.

Centro escolar de cada persoa gañadora: equipo completo de Smart Board (encerado dixital).

Profesor ou profesora que supervise a cada persoa gañadora: ordenador portátil.

Os premios, un por categoría, entregaranse nun acto no Parlamento de Galicia, ao que tamén serán convidados os colexios participantes no concurso. Se quen gañase fose un grupo, haberá un premio para cada integrante.